Falalka ka dhanka ah Soomaalida oo ku sii badanaya Nairobi iyo Eastleigh oo rabshado ka dilaaceen



Iyadoo ay sii badanayaan falalka ay ku dheehantahay Soomaali nacaybka ee ka dhacaya Nairobi, ayaa maanta ay rabshado ka dilaaceen xaafadda Easleigh.

Dad goob joogayaal ah ayaa Hiiraan Online u sheegay in saaka ay shaqaaqo markii dambe fiday ay ka dilaacday wadada JAM Street ee xaafadda Eastleigh.

Rabshada ayaa bilaabatay markii ay isku dhaceen dhalinyaro Soomaali ah iyo qaar kamid Kenyaanka loo yaqaano Jokoraaga (Darbi jiif) ee ku dul nool qashinka meelaha la dhigo.

Balse markii gacanta la isula tagay ayaa rabshadu fiday, iyadoo labada dhinacba ay gurmad kala heleen, taasoo sii siyaadisay baaxada rabshada.

Inta la ogyahay hal wiil oo Kenyaan ah ayaa ku dhintay rabshadaha, iyadoo labada dhinacna ay jiraan dhaawacyo fudud oo soo kala gaaray.

Rabshada maantay oo la isu adeegsanayay baangado,mindiyo iyo dhagax ayaa waxaa markii dambe kala dhex galay booliska oo dadka ku kala cayriyay xabado ay cirka u ridayeen.

Guriga ay rabshadu ka bilaabatay oo la yiraahdo Yaara House ayaa kooxo Kenyan ah isku dayeen inay dab qabadsiiyaan,balse booliska ayaa isku gadaamay goobta, kala fogeeyayna kooxihii dagaallamayay.

Tan iyo markii ay ciidamada Kenya gudaha u galeen Soomaaliya ayaa si wayn loo dareemayaa falalka nacaybka ah ee ka dhanka ah Soomaalida.

Dhacdadii aadka loogu qoslay ayaa ahayd markii ay labo wiil oo Soomaali ah soo koreen bas ay saaranyihiin dad Kenyaan ah xaafadda Westlands, taasoo keentay in dadkii gaariga saarnaa ay qaylo dhaan afka ku shubtaan kana dagtaan gaariga, iyadoo markii dambe wadihii gaarigu uu iska dajiyay wiilashii Soomaalida, taasoo muujinaysa falalka cunsuriyadda ah ee ka dhanka ah Soomaalida.

Fal kan la mid ah ayaa ka dhacay Hotelka Stanley oo labo maalmood ka hor shir loogu qabtay saxafiyiin Soomaaliyeed iyo kuwo caalami ah, kadib markii mulkiilayaasha hotelku ay daqiiqadihii ugu dambeeyay ee shirku bilaaban lahaa ay dalbadeen in shirka la joojiyo oo looga baxo hotelka, iyagoo sabab uga dhigay in aan la sugi Karin ammaanka haddii Soomaali soo gasho hotelka.

Marka la galayo dhismayaasha waawayn ee Nairobi iyo meelaha isbitaallada ayaa il gaar ah lagu fiiriyaa Soomaalida, iyadoo lagu sameeyo baaritaano dheeraad ah.

Haddii ay sii socdaan falalka noocaan ah, waxay u muuqataa in Soomaali badan oo maalgashi ka samaystay Kenya ay xoolahooda la bixi doonaan, iyadoo kuwo hadda u soo socdana ay ka fiirsan doonaan inay maalgashi ka samaystaan Kenya.

Axmed Cabdisamad, Hiiraan Online
 

Talo haddii aad u baahan tahay booqo maamulka talooyin

maamul.com

Haddii aad xaas leedahay booqo

No comments:

Post a Comment

Copyright © Xidig The latest news and headlines . All rights reserved. Template by CB | Published By Kaizen Template | GWFL | KThemes